الرئيسية المدونات أم لأول مرة الشهر الثالث من الحمل

الشهر الثالث من الحمل

دينا سماحة | الأحد 30-09-2012 16:46

مع نهاية الشهر التالت بيكون اتكون البيبي بشكل كامل واتكونت أعضائه، و بيبدأ يتحرك حركات رقيقة من خلال إيديه ورجليه ورأسه. وبتظهر تفاصيل أدق فيه زي الشعر والأظافر، بالنسبة لطوله بيكون وصل وقتها ل 10 سم.
كل المعلومات دي عرفتها من الموقع اللى بتابع عليه حملى، ومن أول ماعرفت معلومة انه بدأ يتحرك، وانا تقريبا بقى عندى تهيؤات انه بيخبط لدرجة انى ساعات بقعد ساكتة لدقايق ومش بتحرك واكتم نفسى كمان علشان احس بيه او باى حركة منه، كان في بالى وقتها انه يمكن احس بيه قبل الميعاد الطبيعي، ومن المعروف ان في نهاية الشهر الرابع او بداية الخامس بتبدأ الحامل تحس بحركة البيبي.
بس بمجرد انى بشوف البيبي بيتحرك في السونار، بيكون عبارة عن كرة كبيرة وكرة صغيرة لازقين في بعض( لان راسه بتكون اكبر من جسمه) والاتنين كانوا بيتحركوا مع بعض في كل مرة بعمل فيها سونار، كان بيزيد فضولى انى احس بحركته وبقول اكيد هو بيتحرك وانا لو ركزت شوية ممكن احس بيه، واللى عرفته فيما بعد انه صعب جدا ان الحامل خصوصا لأول مرة تحس بحركة البيبي في الشهر التالت.
وبالنسبة لطول الجنين، كان مهم ليا انى اعرفه في كل شهر وكنت بتابعه بشكل مستمر، لانه بيوضحلى مدى تطور ونمو البيبي وكل سنتيمتر او جرام بيزيده كان بيمثلى خطوة وانجاز مهم بيفرحني. وفى الغالب اى معلومة جديدة بعرفها بيبقى عندى فضول انى اتابع تطورها في البيبي من خلال الصور او الفديو، او أي تطورممكن احس بيه زي حركة البيبي او انه يبدأ يحصل بروز للبطن وتظهر بشكل واضح (وده ممكن يحصل مع نهاية التالت).
اما اللى بتحسىى بيه في الشهر ده :فأعراض الشهر الأول والتانى بتفضل مستمرة في التالت وممكن تزيد شوية زي الإرهاق والتعب والصداع وتقل في اسفل البطن وتغير في المزاج، شوية قلق وتوتر او احباط، نجي للمشكلة الاكبر وهى زيادة الشهية، او زي ما اتكلمت في المقال اللى فات ان الشهية غالبا بتزيد لحاجات مش مفيدة زي الحلويات والمياه الغازية او الأكل الدسم. ودي مرحلة مريت بها بس على نهاية الشهر التالت قدرت انى اظبط اكلى شوية عن الأول. اما القئ اللى استمر معايا التالت كله كان مسبب لى مشكلة في الأكل واللى بسببه نزل وزنى في الشهر التالت كيلو جرام.
طول الشهر كنت كل كام يوم ابص على نفسي ياترى بان عليا انى حامل ولا لسه؟ واقول اكيد باين عليا بس انا مش واخدة بالي بس للاسف محصلش اى زيادة ملحوظة في محيط البطن لكن بدأت احس بالزياة في الشهر اللى بعده.

ملحوظة مهمة
لازم تخلى جوزك يعرف كل حاجة بتحسي بيها وتتكلمى معاه وتوصفي شعورك واحساسك في كل يوم بيمر عليكي، ولو قدرتي تخليه يتابع معاكى تطورات البيبي وايه الاعضاء اللى اكتملت نموها ويقرا معاكى الموقع والصفحات اللى بتجيبي منها المعلومات بتاعتك ده هيبقى ممتاز.
الفكرة انها هتكون بمثابة تجربة ممتعة ليكم انتم الاتنين، بانكم تجربوها مع بعض، ده كنت بعمله و كنت بلاقى الموقع كاتب كل حاجة ممكن المرأة الحامل تحس بيه في شهور الحمل الأولى وكنت ببقى مبسوطة جدا ان الموقع بيتكلم بلسانى، على الأقل انى مش بتخيل التعب او حتى بدعيه، ساعتها جوزك هيحس بيكي أكتر ويقّدر تعبك وكمان هيساعدك تتخطى اى مشكلة وخصوصا التوتر والقلق.
صحيح على نهاية الشهر التالت ممكن تلاقي نفسك مقصرة في البيت ونضافته، كل اللى اقدر اقوله انك تخففى الضغط على نفسك و تجيبي حد يساعدك في التنضيف.
من خلال تجربتي، الموضوع ده مش هينفع تستهونى بيه وتحاولى تقاومى وتقنعى نفسك انك هتقدرى تتحملى مشقة تنضيف البيت بشكل كامل، لاني حاولت وعملت كده وحطيت فكرة في دماغى ان كل ستات البيوت الشاطرة بتنضف بيتها وانا اللى بدلع وعادى لو تعبت شوية.
وللاسف حصل اللى مكنتش متوقعاه كنت هفقد البيبي وقتها، والدكتور كاتبلى على مثبت للحمل وطلب منى الراحة التامة ومعملش اى مجهود ولا اتعرض لاى حركة، وبالتالى حاولى متضغطيش على نفسك في الشهور الأولى للحمل وأكيد جوزك هيبقى همه الأول سلامتك انتى والبيبي اكتر من الشقة وطلباته

أضف تعليق

التعليقات 1

  • 1 eltotasaja

    الإثنين 01-10-2012 16:27 موضوع جميل جدا وربنا يقوم كل حامل بالسلامة ويرزق المشتاقين يااااارب وفعلا معاكى حق

إستطلاعات

إذا كانت حالتك النفسية سيئة، تقومين بـ